Madaxweyne Shariif oo Madaxtooyada ku qaabilay Wafdi ka socda Q.Midoobay

Villa Somalia

Wafdiga uu Shariifku la kulmay ayaa waxaa hoggaaminayay Ku-xigeenka Kaaliyaha QM u qaabilsan arrimaha Soomaaliya...

Madaxweynaha Soomaaliya Shariif Sh.Axmed ayaa Xarunta Madaxtooyada ee 'Villa Somalia' kula kulmay Ku-xigeenka Kaaliyaha Xoghayaha guud ee Q.Midoobay u qaabilsan Soomaaliya. Ku-xigeenkaas  oo lagu magacaabo Mr.Charles Petrie.

Wafdigan oo ay ujeeddada booqashadiisu ahayd sidii loo xoojin lahaa Xiriirka Beesha Caalamka iyo Dawladda Soomaaliya, ayaa waxay kaloo la kulmeen R/Wasaare Cumar Cabdirashiid.

Madaxa Wafdiga Mr.Charles ayaa Warfaafinta u sheegay: inay iyaga iyo Masuuliyiinta Soomaaliyeed ka wada hadleen: Sidii wax looga qaban lahaa ammaan-darrida, gargaarka aadaminimo iyo kaalmada sidii loo gaarsiin lahaa Cisbitaallada.

Sarkaalkaan ayaa sheegay inay Beesha Caalamku ku kalsoon yihiin wax-qabadka dawladda hal sano ka-dib, ayna diyaar u yihiin kordhinta taageerada Dawladda.

Wafdi ka socday Dawladda Norway oo iyaguna qayb ka ahaa wafdigan ayaa iyaguna ku ballan-qaaday taageeridda Dawladda Midnimo-Qaran,gaar ahaan dhinaca sugidda Ammaanka.

Arrintaan ayaa dhacay maalin un ka-dib markii uu Madaxweynuhu ka soo laabtay Shir-madaxeedkii Midowga Afrika ee Addis-ababa.

Kasmo Online..